ما عدت ورد اللي تحتريها

ما عدت ورد اللي يحتريها

بي من الضيقة كثر ما بي من الأشواق
ومهما زادت ضيقتي ما عرفت كيف احكيها

اشتقت لصاحبي ودي أجيه بعناق
هو الوحيد اللي يعرف نفسي كيف يسليها

اللي كل ما جيته وقافلةٍ معي الأخلاق
يقول لي تكفين عقدة حاجبك فكيها

مرات أردها بضحكه ومرات أردها بخناق
عاد هو وحظه هالسالفه كيف أنهيها

لكني اشتقت له في الزعل ولا الوفاق
ودي أهديه مشاعري الميتة لأجل يحييها

لأنه هو اللي قتلها قبل الفراق
ما قدر محبتي له ولا قال ما بيها

إن جيت قال يا مرحبا وإن رحت قال بالطقاق
بالله ذي محبه ولا وش أسميها

وأنا كل ما قلت في رحلة الهجر أبي ابدأ الإنطلاق
ارجع وأقول يا بنت غلطة المحبوب عديها

واليوم وصلت معي وصار هرجه لا يطاق
ولو يضيق الكون فيني لا وربي ما أمشيها

ياللي تقول كنتوا أحلا اثنين عشاق
إيه كنا ولكن كلمتي وحده ما أثنيها

قلت الفراق يعني الفراق
وإن صار ورجعت ترى ما ني ورد اللي يحتريها.

أسمعك يلي تناديني




أسمعك يالليي تناديني يا بو قلب خلي
بس أنا ماني خلي القلب لجل اسكت وأجيك

الخلي ما هوب قلب من هيامك ممتلي
الخلي قلب ادمي شافك ولا هام فيـــك

أنت زعلان لجفاي وما دريت أن زعلي
يوم قلبك ما يبيني قد ما قلبي يبيك

حتى لو عيت همومك في غيابي تنجلي
كل هذا ما يساوي لهفتي يوم احتريـــك

وان كان ما صدقت هرجي طيب اسمع ما يلي:
يا حبيبي يا عسى ربي يحفظك ويهديك

جايز انك في غيابي تقلب الدنيا علي
بس أنا من قبل أعرفك قالب الدنيا عليك.


*************